JNV:Admission Notification to Class VI in Jawahar Navodaya Vidyalayas (2023-24)

హనుమాన్‌జంక్షన్‌, న్యూస్‌టుడే: జవహర్‌ నవోదయ విద్యాలయాల్లో ఆరో తరగతిలో ప్రవేశాలకు సంబంధించి దరఖాస్తు ప్రక్రియలో తీసుకొచ్చిన కొత్త నిబంధనలపై ఆందోళన వ్యక్తమవుతోంది. ఈ ఏడాది ప్రవేశ పరీక్షను ఏప్రిల్‌ 29న నిర్వహించాలని నిర్ణయించి, అభ్యర్థుల నుంచి దరఖాస్తులు ఆహ్వానిస్తున్నారు. ఈ నెల 31 వరకు ఆన్‌లైన్‌ ద్వారా దరఖాస్తులు చేసుకునేందుకు అవకాశం కల్పించారు. అయితే నూతన జాతీయ విద్యా విధానంలో భాగంగా ఈ ఏడాది ప్రవేశాల ప్రక్రియలో కొన్ని మార్పులు చేశారు. ఏ జిల్లాలోని నవోదయలో విద్యార్థులు ప్రవేశం కోరుకుంటున్నారో, ప్రస్తుత విద్యా సంవత్సరంలో వారు అయిదో తరగతి అదే జిల్లాలోని ప్రభుత్వ, ప్రభుత్వ గుర్తింపు పొందిన పాఠశాలల్లో చదివితే ఇంతకుముందు వరకు సరిపోయేది. తాజా నిబంధనల ప్రకారం చదువుతున్న పాఠశాలతో పాటు, విద్యార్థి, విద్యార్థి తల్లిదండ్రుల చిరునామా కూడా అదే జిల్లాలో ఉండాలి. లేకుంటే దరఖాస్తు చేసుకునేందుకు అవకాశం లేకుండా పోతుంది. ఉదాహరణకు కృష్ణా జిల్లా బాపులపాడులో నివసిస్తూ, సరిహద్దునే ఉన్న ఏలూరు జిల్లా ఏపూరు గ్రామంలోని ఓ కార్పొరేట్‌ పాఠశాలలో అయిదో తరగతి చదువుతున్న విద్యార్థి, తన ఆధార్‌ చిరునామా ప్రకారం ఏలూరు జిల్లా నవోదయకు దరఖాస్తు చేసుకోవడానికి వీలుండదు. అదే సమయంలో కృష్ణా జిల్లా నవోదయకు దరఖాస్తు చేసుకుందామంటే చదివే పాఠశాల ఏలూరు జిల్లా పరిధిలోది కావడంతో ఇక్కడా అర్హత లభించదు. 2022-23 విద్యా సంవత్సరంలో ఆరో తరగతిలో చేరేందుకు 2009, మే ఒకటి నుంచి 2013, ఏప్రిల్‌ 30 మధ్య జన్మించిన వారు అర్హులుగా నోటిఫికేషన్‌ జారీ చేశారు. 2023-24 సంవత్సరానికి వచ్చేసరికి 2011, మే ఒకటి నుంచి 2013, ఏప్రిల్‌ 30 మధ్యన జన్మించిన వారు మాత్రమే అర్హులని పేర్కొన్నారు. గతేడాది నాలుగు సంవత్సరాల వీలు(గ్యాప్‌) కల్పించగా, ఈసారి దానిని రెండేళ్లకు కుదించేశారు. ఈ సమస్యను పరిష్కరించాలని తల్లిదండ్రులు కోరుతున్నారు.