పరిగెత్తుతున్నప్పుడు తీసుకోవాల్సిన జాగ్రత్తలు

జీవితమే ఒక పరుగు..ఆ పరుగు లేకపోతే ఆరోగ్యమే లేదు. ఎలాంటి జబ్బు వచ్చినా, రాకుండా ఉండాలన్నా పరుగు తప్పదు. దాంతోనే ఆరోగ్యం ముడిపడి ఉంటుందని నిపుణులు చెబుతున్నారు. ఆ పరుగు సక్రమంగా చేయకపోతే లేనిపోని అనర్థాలు వస్తాయి. ఎలాంటి ఇబ్బందులు లేకుండా తీసుకోవాల్సిన జాగ్రత్తలు ఏంటో తెలుసుకోండి.

* రోజూ కాసేపు పరుగెత్తడం శరీరానికి చక్కని వ్యాయామం. మనలో చాలా మంది ఏమీ తినకుండానే పరుగు అందుకుంటారు. ఇది పొరపాటని నిపుణులు చెబుతున్నారు.

* పరగడుపున పరుగెత్తడంతో శరీరంలోని కొవ్వులను కరిగించడానికి తగిన ఇంధనం అందించనట్టే. దాంతో కొవ్వు కరగకపోగా మరింత నీరసించిపోతాం. కార్బోహైడ్రేట్లు లభించే అరటి, యాపిల్‌, మామిడి పండ్లు, పాలు, డ్రైఫ్రూట్స్‌, బ్రెడ్‌, కాయధాన్యాలు గంట ముందే తీసుకోవాలి. ఆ తర్వాత పరుగెత్తాలి.

* పరుగెత్తడం పూర్తయ్యాక శరీరం కోల్పోయిన శక్తిని తిరిగి పొందడానికి ప్రోటీన్లు, కార్బోహైడ్రేట్లు లభించే ఆహార పదార్థాలను తీసుకోవాలి.

* నీళ్లు తాగిన తర్వాతనే పరుగు మొదలెట్టాలి.  ఆ తర్వాత కూడా నీళ్లు తాగాలి. చేతులు  స్థిరంగా ఉంచకుండా అటుఇటు కదలించాలి.

* భుజాలు బాగా ఊపాలి. చేతులు పొట్టకు దగ్గరగా పెట్టుకొని ముందుకు వెళ్లాలి.

* చాలా మందికి వదులు, పొట్టి దుస్తులు ధరించడం అలవాటు. శరీరానికి అతికినట్టు ఉండే కాటన్‌ దుస్తులు వేసుకోవాలి.

* మెత్తటి రన్నింగ్‌ షూలను ఎంపిక చేసుకోవాలి. అవి పాదాలకు ఇబ్బంది కలగకుండా ఉండేలా చూసుకుంటే మంచిది.

* నడకతో మొదలెట్టి క్రమంగా వేగం పెంచి పరుగు చేపట్టాలి. ఒక్కసారిగా వేగం మంచిది కాదు. వారానికి ఒకరోజు శరీరానికి విశ్రాంతి ఇస్తే బాగుంటుంది.